தேர்தல் நேரத்து சுப்பன்கள்..

மறுபடியும் ஒரு தேர்தல்,
சாயமும் தூரிகையுமாக சுப்பன்..
களமிறங்கினான் தன் தலைவனுக்காக..
வெள்ளைச்சுவர்கள் சாயப்பட்டன.
வெற்றிப்புன்னகையுடன் தலைவன், ஒரு சுவரில்..
அலட்சியப்புன்னகையுடன் கூர் வாள் ஏந்தி மற்றொரு சுவரில்..
கதாநாயகன் சிரிப்போடு, ஏனோ தெரியாது
இருந்தாலும் கைத்துப்பாக்கியுடன் இன்னொன்றில் !
சிங்கங்களுக்கு நடுவில் நிற்பது போல்,
போர் வீரன் உடையில்... கிரிக்கெட் மட்டையோடு...
காரணமில்லாமல் கோட்-சூட், குளிர் கண்ணாடி அணிந்து என்று
அடுக்கிக்கொண்டே போகலாம் அபத்தங்களை..

மாலை வீடு திரும்பினான் களைத்து...
இங்கே மட்டும் ஏனோ இவனால்
சிரிப்புச்சாயம் பூச முடியாத வாடிய முகங்கள்.